Студии
На Факултетот за ветеринарна медицина – Скопје се организирани следните студиски програми: интегрирани студии од прв и втор циклус на македонски и англиски, втор циклус специјалистички студии по Безбедност и квалитет на храна и трет циклус докторски студии по Ветеринарната медицина и Безбедноста на храната.
Ветеринарната професија е од суштинско значење за концептот „Едно здравје“ и одржливиот развој на општеството. Преку современа настава и научноистражувачка работа, ФВМС создава стручен кадар кој има клучна улога не само во заштитата на здравјето на животните, туку и во унапредувањето на јавното здравје и обезбедувањето безбедна храна за населението.
Додипломски Студии
Додипломските студии се организирани како интегрирани студии од прв и втор циклус, во траење од 6 години (12 семестри). Со нивно успешно завршување се стекнува академскиот назив доктор по ветеринарна медицина.
Докторски Студии
Третиот циклус студии претставува надградба на стручните знаења, вештини и компетенции, како и развој на способностите за научноистражувачка работа кај докторите по ветеринарна медицина и сродните дисциплини.
Специјалистички студии
Динамичноста на ветеринарната професија и секојдневниот развој на нови сознанија и техники бараат континуирано усовршување и унапредување на стекнатите компетенции. Со цел развој на стручните вештини, на Факултетот за ветеринарна медицина се реализираат едногодишните специјалистички стручни студии по „Безбедност и квалитет на храна“ (2 семестри – 60 ЕКТС).
Наука
Покрај наставно-образовната и апликативната дејност, на ФВМС активно се реализира и научноистражувачка работа како една од темелните активности на Факултетот. Стратешка определба на Факултетот е да се развива како водечка научна и високообразовна установа во областа на ветеринарната медицина во национални и меѓународни рамки.
Проекти
На ФВМС активно се реализираат национални и меѓународни научноистражувачки од областа на ветеринарната медицина, безбедноста на храната и јавното здравје. Преку проектните активности, Факултетот придонесува кон развој на науката, иновациите и практичната примена на современи решенија во општеството.
COST Акции
COST акциите претставуваат европски програми за научна соработка кои овозможуваат поврзување на истражувачи, универзитети, институции и од различни земји. COST (European Cooperation in Science and Technology) поддржува вмрежување, размена на знаења, обуки, работилници, конференции, краткорочни научни престои и заеднички активности.
Меѓународна Соработка
Меѓународната соработка е важен фактор преку кој се гарантира и унапредува квалитетот на високобразовните програми, поради што една од целите на Факултетот за ветеринарна медицина е воспоставување и интензивирање на овој вид соработка со ветеринарните и други сродни факултети и универзитети во странство.
Студенти
На Факултетот за ветеринарна медицина – Скопје, студентите се организирани во Факултетско студентско собрание на ФВМ-С, кое ги застапува интересите на студентите не само на локално, национално, туку и на меѓународно ниво. Собранието активно учествува во унапредување на студентскиот живот, организирање на активности, како и во соработка со раководството на факултетот и други студентски организации.
ФССФВМС
Факултетското студентско собрание на Факултетот за ветеринарна медицина – Скопје (ФСС ФВМС) е тело во кое членуваат претставници на студентите. Тие се избираат на непосредни, фер и демократски избори со тајно гласање, а право на избор и да бидат избрани имаат сите студенти запишани во тековната учебна година.
IVSA
Интернационалната ветеринарна студентска асоцијација (IVSA) е меѓународна организација на студенти по ветеринарна медицина, основана во 1951 година во Утрехт, Холандија. Таа брои повеќе од 50 членки од целиот свет и активно работи на воспоставување и унапредување на соработката со земји кои сè уште не се нејзини членки.
Студентски Правобранител
Заради остварување и заштита на правата и интересите на студентите на Факултетот за ветеринарна медицина – Скопје, се избира заменик студентски правобранител. Тој се избира од Факултетското студентско собрание (ФСС ФВМС), по претходно објавен конкурс, од редот на редовните студенти.
Факултет
Факултетот за ветеринарна медицина-Скопје, како една од најмладите единици на Универзитетот „Св. Кирил и Методиј“ во Скопје, се залага за развој и имплементација на европските стандарди, како и факултетите членки на EAEVE (Европска асоцијација на ветеринарни високообраозвни установи).
Ветеринарната професија е регулирана професија, што значи дека сите доктори по ветеринарна медицина треба да бидат лиценцирани за да ги имплементираат своите вештини и знаења во секојдневната клиничка пракса. Сите дипломирани доктори по ветеринарна медицина треба да ги исполнат минималните стандарди предложени од страна на EAEVE т.н Day one competences, како почетна точка за различни улоги во ветеринарната професија.
Покрај примарната образовна дејност, својата мисија и цели Факултетот ги остварува преку научна и апликативна работа, која во најголем дел се изведува во акредитирани лаборатории според стандардот ISO17025.
Универзитетската ветеринарна болница, како составен дел на ФВМС, има за цел да ја обедини едукацијата на студентите по ветеринарна медицина на едно место, овозможувајќи им да бидат дел од сите услуги на современата клиничка дијагностика, спроведување на терапевтски протокол и хируршки интервенции, бидејќи само на овој начин може да обезбеди целосен успех.
Дејност
Факултетот за ветеринарна медицина – Скопје врши наставно-образовна, научноистражувачка и апликативна дејност од областа на ветеринарната медицина. Дејноста на ФВМ-С се остварува преку организирање студии и пренесување знаења.
Историјат
Факултетот за ветеринарна медицина – Скопје е основан во учебната 1991/1992 година како насока на Земјоделскиот факултет во Скопје. Во 1993 година насоката е издвоена во самостоен Ветеринарен факултет, а во 1994 година е официјално верифицирано неговото формирање и работа во Република Македонија.
Деканатска Управа
Деканатската управа е орган на управување на Факултетот. Деканатската управа ја сочинуваат деканот, продеканите, раководителот на Националниот институт за ветеринарство и храна и претседателот на Факултетското студентско собрание.